توكيل بيع الشقه

بقول الحمد لله أخيرا اتعلم
بس كنت غلطانة
الطبع مبيتغيرش بيستخبى بس
بعد أسبوعين ابتدت أمه تتصل بيه كل يوم
يا حبيبي انت عامل ايه
يا حبيبي مراتك عاملاك ايه
يا حبيبي تعالى اقعد معايا شوية
وهو يرد عليها قدامي ويقول كويس يا ماما الحمد لله
وبعد ما يقفل يقولي معلش يا حبيبتي أصلها وحيدة
أقول وحيدة ازاي وهي عندها بيت وعندها بنت أختها وعيالها قاعدين عندها
يسكت
بعدها بشهر قالتله تعالى بات معايا يومين أصلي تعبانة
راح
قال يومين ورجع بعد أسبوع
رجع متغير
مبقاش يغسل مواعينه
مبقاش يلم هدومه
رجع يقول أمي كانت بتعمل كذا
أمي قالت كذا
انتي ليه مش زي أمي
قلتله عشان أنا مش أمك أنا مراتك، أمك على راسي بس أنا مش الخدامة بتاعتها ولا بتاعتك
زعل وقفل على نفسه الأوضة
بليل سمعته بيكلمها في التليفون وبيقول عندك حق يا ماما هي اتغيرت
اتغيرت
أنا اللي اتغيرت ولا انت اللي نسيت بسرعة إنك كنت هتتطرد من الشقة لولا إني وافقت ترجع
فقت الصبح لقيته كاتبلي ورقة على التلاجة
أنا رايح عند أمي يومين
يومين تاني
أصلها بقت موضة اليومين دول
سيبته يروح
وقعدت في شقتي لوحدي
شغلت مزيكا أهلي كانوا بيحبوها
وروقت الشقة كلها
وفتحت الشباك
الهوا دخل كأن الشقة كانت مخڼوقة وهو فيها
قعدت أفكر
هو أنا عايزة أكمل كده
كل شوية أمه تسخنه ويرجع يتغير ويسيب البيت ويرجع تاني
ده مش جواز
ده لعبة القط والفار
كلمت المحامي
قلتله لو عايزة أطلق إيه اللي يحصل في الشقة
قال الشقة بتاعتك مية في المية ملهاش دعوة بالطلاق، هو ملوش فيها ولا جنيه، وحتى العفش اللي أهلك جايبينه بتاعك
قلت ولو هو مش عايز يطلق
قال تخلعيه، والقانون معاكي عشان الشقة باسمك وهو ملوش حق يقعد فيها لو انتي مش عايزة
الكلمة رنت في وداني
أخلعه
عمري ما فكرت فيها
7 سنين جواز وكنت فاكرة الطلاق ده فشل
بس دلوقتي بقيت شايفاه نجاح
نجاح إني أنقذ نفسي من واحد كل ما أمه تقوله شمال يمشي شمال
رجع بعد اليومين
دخل لقى الشقة نضيفة وريحتها حلوة وأنا قاعدة بشرب شاي بالنعناع ومشغلة فيلم بحبه
قال السلام عليكم
قلت وعليكم السلام
قال مفيش أهلا
قلت أهلا
قعد
قال أمي بتسلم عليكي
قلت الله يسلمها
قال مش هتقولي هتروحي تشوفيها
قلت لا
قال ليه
قلت عشان آخر مرة رفعت إيدها عليا وانت واقف بتتفرج، وأنا مش هروح لحد رفع إيده عليا
قال ما هي كانت متعصبة
قلت وأنا لما بتعصب برفع إيدي عليها، لا صح، عشان أنا متربية
سكت
قال بصي أنا تعبت من الخناق ده
قلت وأنا تعبت أكتر منك بكتير، تعبت 7 سنين أشرحلك إني بني آدمة مش مكنسة وطباخة وغسالة، تعبت أفهمك إن احترام أهلك ليا هو احترامك انت ليا، وانت مفهمتش
قال طب عايزة ايه
قلت عايزة كل واحد يروح لحاله
وشه اتخض
قال يعني ايه
قلت يعني طلقني
قال انتي بتهزري
قلت لا، بتكلم بجد، الشقة دي بتاعتي وهتفضل بتاعتي، وانت تاخد هدومك وحاجتك وتروح تقعد مع مامتك اللي بتحبها أكتر مني، وأنا أقعد في بيت أهلي اللي سابوهولي أمانة
قال مش هطلق
قلت براحتك، أنا هخلعك
ضحك بسخرية مش هتعرفي
قلت هتشوف
تاني يوم رحت للمحامي وبدأت إجراءات الخلع
لما جاله الإعلان على البيت أمه جت معاه
خبطوا على الباب
فتحت
حماتي أول ما شافتني قالت يا خړابة البيوت
قلت أنا خربت بيتي ولا انتي اللي خربتيه لما علمتي ابنك يمد إيده على مراته ويسرق شقتها
قالت احنا مسرقناش
قلت المحامي بتاعك اللي كتب التوكيل لسه موجود والورق متصور، تحبي أوديه النيابة
سكتت
جوزي قال طب نتصالح
قلت فات الأوان، انت كان عندك فرصة لما رجعتك البيت وقلتلك احترمني، وانت ضيعتها ورحت لأمك تاني
حماتي قالت ابني ميستاهلش واحدة زيك
قلت عندك حق، يستاهل واحدة زيك بالظبط تقعد تقوله حاضر ونعم وتسكت وهي بتتهان، وأنا مش كده
قفلت الباب في وشهم
بعد 3 شهور اتخلعت
القاضي حكم بسرعة عشان الورق كله باسمي وهو ملوش أي حاجة
يوم الحكم خرجت من المحكمة روحت على شقتي
فتحت الباب
الشقة فاضية وهادية
مفيش هدوم مرمية
مفيش صوت عالي
مفيش حد بيقولي أمي قالت
قعدت في نص الصالة وعيطت
عيطت أوي
مش عشان زعلانة
عشان حاسة إني أخيرا رجعت بيت أهلي
البيت اللي كانوا بيحلموا إني أعيش فيه مبسوطة
فرشت سجادة جديدة
علقت صورة أهلي كبيرة في الصالة
وجبت قطة صغيرة تونسني
وبقيت كل يوم الصبح أصحى أعمل فطار لنفسي وبس
قهوة وشاي وبيض وعيش
وأقعد في البلكونة أتفرج على الشارع
الجيران بقوا يقولوا وشك نور بعد الطلاق
أصل الست لما بتشيل من على كتفها راجل تقيل
وشها بينور
وجوزي
سمعت إنه لسه قاعد عند أمه
أمه اللي كانت عايزة تاخد شقتي عشان تديها لبنت أختها
بنت أختها سابت البيت ومشيت برضه
وفضلوا هما الاتنين قاعدين يبصوا لبعض
مرة قابلته في السوبر ماركت
قال عامل ايه
قلت زي الفل
قال وحشتيني
قلت الشقة موحشتهكش
سكت ومشي
وأنا روحت بيت أهلي
اللي هو بيتي أنا وبس
وقفلت الباب بالمفتاح ونمت مرتاحة
أصل مفيش أحلى من نومة الست في بيتها وهي عارفة إن مفيش حد هيصحيها يقولها قومي اعملي وروقي ولمي هدوم جوزك
ولا حد هيرفع إيده عليها تاني